Торгох ялаар шийтгэв

Дархан-Уул аймаг дахь сум дундын Анхан шатны шүүх 2025.02.03 дугаар: 2025/ШЦТ/65

 

Шийдвэрийн төлөв: Хүчин төгөлдөр болоогүй.

Шийдвэрийн хураангуй.

 

Санамж: Энэ хураангуй нь бүрэн гүйцэд шүүхийн шийдвэр биш бөгөөд түүнийг орлохгүй, зөвхөн шүүхийн шийдвэрийг олон нийтэд ойлгомжтой байдлаар мэдээлэн хүргэх зорилготой болно.

 

Дархан-Уул аймгийн Прокурорын газрын хяналтын прокуророос Эрүүгийн хуулийн тусгай ангийн 17.3 дугаар зүйлийн 2 дахь хэсгийн 2.2 дахь заалтад заасан гэмт хэрэгт холбогдуулан яллах дүгнэлт үйлдэж ирүүлсэн А-д холбогдох эрүүгийн хэргийг 2025 оны 01 дүгээр сарын 03-ны өдөр хүлээн авч, 2025 оны 02 дугаар сарын 03-ны өдөр хянан хэлэлцэв.

 

Шүүгдэгч А нь 2024 оны 8 дугаар сарын 22-ны өдрөөс 2024 оны 10 дугаар сарын 10-ны өдрийг хүртэлх хугацаанд огт хөдөө яваагүй атлаа иргэн Б-д “самар авч байна, яаралтай мөнгө хийгээрэй, самар ихээр орж ирж байна” гэж худал хэлэн хуурч банкны ********** дугаартай дансаар дамжуулан 8 удаагийн гүйлгээгээр 150,000,000 төгрөгийг шилжүүлэн авч, гар утсаараа yondoo.tech сайтаар TOPAZ гэх нэртэй покер тоглоом тоглон алдаж, их хэмжээний хохирол учруулсан болох нь гэрч, хохирогч нарын мэдүүлэг болон хэрэгт авагдсан бусад нотлох баримтуудаар хангалттай нотлогдон тогтоогдсон тул шүүгдэгч А-д Эрүүгийн хуулийн тусгай ангийн 17.3 дугаар зүйлийн 2 дахь хэсгийн 2.2 дахь заалтад зааснаар 12,000 /арван хоёр мянга/ нэгжтэй тэнцэх хэмжээний буюу 12,000,000 /арван хоёр сая/ төгрөгөөр торгох ял шийтгэж, торгох ялыг шийтгэх тогтоол хүчин төгөлдөр болсноос хойш 24 сарын хугацаанд, сар бүр 500,000 төгрөгөөр хэсэгчлэн төлүүлэхээр тогтоож, тогтоосон хугацаанд уг ялыг биелүүлээгүй бол биелэгдээгүй торгох ялын арван таван нэгжтэй тэнцэх хэмжээний төгрөгийг нэг хоногоор тооцож хорих ялаар солихыг сануулж, шийтгэх тогтоолын биелэлтийг Шүүхийн шийдвэр гүйцэтгэх газарт даалгаж, Иргэний хуулийн 497 дугаар зүйлийн 497.1, 510 дугаар зүйлийн 510.1 дэх хэсэгт зааснаар шүүгдэгч А-гаас 137,500,000 төгрөг гаргуулж, хохирогч Б-д олгохоор шийдвэрлэв.

 

Тоймыг бэлтгэсэн: Дархан-Уул аймаг дахь сум дундын Анхан шатны шүүхийн шүүгч Г.Гэрэлт-Од

Санамж: Энэ хураангуй нь шүүхийн бүрэн гүйцэд шийдвэр биш бөгөөд түүнийг орлохгүй, зөвхөн олон нийтэд ойлгомжтой байдлаар мэдээлэл хүргэх зорилготой болохыг тэмдэглэв. Шийдвэрийн дэлгэрэнгүй мэдээлэлтэй ЭНД ДАРЖ танилцана уу.